Pogoy gipasidunggan na sab sa PBA
CEBU, Philippines — Ang garbo sa Sugbo nga si Roger Pogoy mikuha og atensiyon sa duha ka sagunson nga daog sa TNT Katropa sa miaging semana.
Gipasidunggan nga Rookie of the Year sa miaging season, si Pogoy miduwa nga mura’g usa ka beterano sa dihang gipilde sa KaTropa ang Blackwater Elite ug Meralco aron pag-angkon og bahin sa ikatulong puwesto uban sa Alaska Aces bitbit ang managsamang 3-2 record sa Philippine Cup.
Si Pogoy mi-average og 19.5 points, 6.0 rebounds ug 2.0 steals sa duha ka ratsada sa TNT aron pagbira sa PBA Press Corps Player of the Week award.
Ang batan-on nga Sugboanong guwardiya mikadlit og 24 puntos uban ang walo ka rebounds, tulo ka assists ug duha ka steals sa 92-83 nilang kadaogan batok sa Elite.
Upat ka adlaw ang milabay, nagpabilin ang kainit sa kanhi batos sa Far Eastern University (FEU) Tamaraws.
Ang 25-anyos nga si Pogoy mitimbre og 15 puntos, upat ka rebounds ug duha ka steals sa dihang giunay og pilde sa KaTropa ang igsuon nilang koponan nga Meralco, 99-81.
Gipukan ni Pogoy ang teammates niyang sila si Troy Rosario, Jayson Castro ug RR Garcia, Rashawn McCarthy ug Glen Khobuntin sa KIA, Rafi Reavis sa Magnolia, Vic Manuel ug Sonny Thoss sa Alaska, JuneMar Fajardo ug Arwind Santos sa San Miguel ug Sean Anthony sa GlobalPort alang sa maong senemanang pasidungog.
- Latest
