J&J Surplus mipakgang sa E&F Surplus

CEBU, Philippines — Pakyas ang E&F Surplus pagkompleto og 11-0 sweep  human miyukbo  ngadto sa J&J Surplus sa iskor nga 128-123 pagtapos sa elimination sa 10th J&J Surplus  basketball tournament niadtong Sabado sa gabii didto sa GT Academy gym sa Tayud, Lilo-an.

Lima ra ka players ang nakapuntos, apan ang nakanindot kay pulos kini mirehistro og double digits. 

Sila si Remegio Adolfo ug Glen Herra maoy midala sa nagpungasi nga ataki sa J&J Surplus nga nagkumboya’g 75 puntos. Si Adolfo mipatuasik og 38 puntos, samtang si Herra mipabuhagay og 37 puntos sa J&J Surplus ni Henry Agbon nga milabaw og 20 puntos human sa third quarter, 96-76.

Laing miiskor og double figures mao sila si Undo Genterolizo, Jomar Tiwan ug Arnold Astillero.

Si Tingan Gestopa mao sab ang topscorer sa E&F Surplus nga miratsada og 39 puntos, gisundan sa team owner nga si Fury Trazona sa iyang 21 puntos ug Tata Betinol nga adunay 16 puntos. Sila si Anton Tranghia ug Kent Nuñez nagkumboya’g 21 puntos  sa napildeng E&F Surplus.

Sa laing aksiyon, ang Villa Reyna Subd. midaog batok sa RCRM Hardware,  104-99 sa pagpangulo nilang Lumaad ug Achumbre nga parehong mitimbre’g 25 puntos.

Nangulo sa RCRM Hardware mao si John Lauron nga miariya og 42 puntos, gisundan ni Rex Berandal ug Rodulfo Granada sa ilang 25 ug 10 puntos matag usa.

Midaog sab ang St. Louis batok sa Union Galvasteel pinaagi sa ‘default’.

Bisan pa sa kadaogan, ang RCRM Hardware pakyas pagsulod sa Top 8.

Nasulod sa Top 8 mao ang J&J Surplus, E&F Surplus, GT Cosmetics, St. Louis, Victorious Safety, Villa Reyna Subd., Union Galvasteel ug D’ Jammerz.

Isip top 2 teams, ang  J&J Surplus ug E&F Surplus nakaangkon og ‘twice-to-beat’ incentives sa quarterfinals. 

Karong gabii, sangkaon sa J&J Surplus ang no. 8 D’ Jammerz, samtang harungon sa E&F Surplus ang no. 7 Union Galvasteel.

Sa laing bahin, magtagakay ang GT Cosmetics (no. 3) ug Villa Reyna Subd. (no. 6), ingon man ang St. Louis (no. 4) batok Victorious Safety (no. 5).

Ang mga modaog makaangkon og luna sa semifinals.

Ang mga duwa ubos sa superbisyon ni commissioner Fury Trazona sa abag nilang Ranil Pepito, Harry Espante, Kenneth Tagalog ug Choy Pilapil.

PUNTOS MATAG USA

Unang duwa:

J&J Surplus (128) – Adolfo 38, Herra 37, Genterolizo 21, Tiwan 16, Astillero 14.

E&F Surplus (123) – Gestopa 39, Trazona 21, Betinol 16, Tranghia 11, Nuñez 10, A. Sabang 5, Caballes 2, Ponce 2, K. Sabang 2.

Ikaduhang duwa:

VILLA Reyna (104) Lumaad 25, Achumbre 25, Abenaza 22, Tradio 11, Yurag 8, Didart 5, Bert 4.

RCRM Hardware (99) – Lauron 42, Berandal 25, Granada 10, Aller 8, Ore 4, Noval 4.