Celtics napukan sa Magic

CEBU, Philippines — Literal nga nagmadyik ang Orlando Magic.

Gamit ang nagpungasi nga opensiba sa ikatulong kuwarter, ang Magic  mipakugang sa Boston Celtics, 103-95 sa NBA kagahapon didto sa TD Garden sa Boston, Massachusetts.

Si Elfrid Payton mikadlit og 22 puntos alang sa Magic nga napilde sa katapusan nilang 14 ka duwa didto sa Boston sukad pa niadtong Pebrero 2010.

“It feels good to get a win, especially after playing well,” matud pa ni Payton.

Sa maong kadaogan, gilawgaw sa Orlando ang pagbalik gikan sa injury ni Boston point guard Kyrie Irving, kansang 40 puntos wala makapugong sa Celtics nga mapilde sulod sa tulo ka sunod-sunod ka duwa sa labing unang higayon karon nga season.

Sila si Jaylen Browns ug Marcus Morris nagkumboya’g 29 puntos alang sa pilderong kawsa.

“We haven’t played consistently on both ends for a while now,” pasabot pa ni Celtics coach Brad Stevens sa ilang kapakyasan. 

Si Evan Fournier miposte og 19 puntos, samtang si Aaron Gordon midugang og 11 puntos ug 12 ka rebounds alang sa Magic nga maoy alkansi sa halftime sa iskor nga 59-58.

Apan ang Magic mitagak og eksplosibong 32-12 nga bomba sa ikatulong kuwarter aron pagkulit og 90-71 nga labaw nga wala na nila buhii pa.

Didto sa San Antonio, si Victor Oladipo mipatik og 19 puntos sa dihang giputol sa Indiana Pacers ang 14 ka nagkadinang daog sa Spurs didto sa ilang home court sa iskor nga 94-86.

Si Darren Collison mitali og 15 puntos alang sa Pacers nga mipakgang sab sa tulo  ka sagunson nilang pilde.

Samtang ang Spurs napilde didto sa ilang balwarte sa ikatulo pa lamang nga higayon karon nga season.

Sa Los Angeles, si Jordan Clarkson mibahog og 29 puntos ug 10 ka assists ug si Julius Randle midugang og 27 puntos ug 12 ka rebounds sa dihang gilumsan  sa Los Angeles Lakers ang New York Knicks, 127-107 alang sa ikaunom nilang daog sa katapusan nilang walo ka duwa.