Brownlee misaad og titulo sa Alab

CEBU, Philippines — Sama sa iyang gihimo sa Barangay Ginebra nga nahatagan niya og duha ka kampiyonato, ang import nga si Justin Brownlee misaad nga buhaton niya ang tanan aron matabangan ang Alab Pilipinas nga makuha ang titulo sa ASEAN Basketball League.

Si Brownlee mirehistro sa iyang tournament-high 36 puntos alang sa Alab nga misakmit sa ikaduha nilang sunod-sunod nga daog batok CLS Knight sa Indonesia sa iskor nga 92-87 sa miaging gabii didto sa Surabaya, Indonesia.

Sa maong kadaogan, ang Alab ni coach Jimmy Alapag  nagbitbit na karon og  5-4 nga baraha  ug mipahiluna sa ikalimang dapit sa standing. Ilang naapsan ang Singapore Slingers  nga adunay 5-6 record.

Si Brownlee nga aduna sa’y walo ka rebounds ug pito ka assists miingon nga pabilin siya nga usa ka ‘resident import’ sa Ginebra ug  segurado na siya moduwa sa Commissioner’s Cup, apan gusto una siya nga moduwa sa Alab nga iyang gitan-aw  nga adunay dakung kapabilidad nga mapalagpot ang defending champion Hong Kong Eastern Lions nga gibidahan ni Fil-German Chris Standhardinger. 

Si Brownlee nga gikuhang replacement import sa Alab hulip ni Reggie Okosa niadtong miaging buwan nag-average og dul-an sa 30 puntos sa Alab.