LeBron mohimo’g laing kasaysayan

CEBU, Philippines — Suwayan karon ni Cleveland Cavaliers superstar LeBron James nga mopatik og laing kasaysayan pinaagi sa pagkulit sa ika-30,000 niyang career points sa ilang duwa batok sa Oklahoma City Thunder karong adlawa.

Ang 33-anyos nga si James aduna na’y 29,975 points ug 25 puntos na lang ang kuwang aron mahimong labing batang player nga moabot sa maong career point mark.

Si Los Angeles Lakers legend Kobe Bryant maoy kasamtangan naghupot sa maong rekord dihang miabot siya og 30,000 points sa edad nga 34 niadtong tuig 2012.

Si LeBron anaa sa ikaunom nga dapit sa all-time scoring leaders sunod nila ni Kareem Abdul-Jabbar (38,387), Karl Malone (36,928), Bryant (33,643), Michael Jordan (32,292), Wilt Chamberlain (31,419) ug Dirk Nowitzki (30,808).

Hinuon, si James miklaro nga wala sa iyang huna-huna ang makuha na ang maong rekord karon tungod kay mas importante kaniya ang modaog ilabi na nga sangkaon nila ang lig-ong Thunder.

Usa ka sikit nga duwa ang gilauman  ni James tungod kay kompleto ang   “Big 3” sa Thunder nga silang Russell Westbrook, Paul George ug Carmelo Anthony.