Curry, Durant nag-una pagka-MVP
CEBU, Philippines — Sa talagsaon kaayo nga higayon, duha ka teammates ang nalakip sa nag-unang mga kandidato pagka-MVP sa NBA karong season.
Kini mao sila si Kevin Durant ug Stephen Curry sa Golden State Warriors nga bag-o pa sab ginganlan nga starters gikan sa Western Conference sa umaabot nga NBA All-Star Game.
Sa labing uwahing ranking sa liga, si Durant maoy nag-una sa karera pagka-MVP, samtang si Curry nalista ikatulo.
Si Durant, ang Finals MVP sa miaging season, dunay average nga 26.2 points, 6.9 rebounds ug 5.4 assists karong tuiga, samtang si Curry nga duha na ka higayon gipasidunggang MVP, mitala og 27.7 points, 6.5 assists ug 5.3 rebounds matag duwa.
Nagpatunga kanila alang sa ikaduhang puwesto mao si James Harden sa Houston Rockets uban sa average niining 31.7 points, 9.0 assists ug 4.9 rebounds.
Si DeMar DeRozan sa Toronto Raptors maoy ikaupat sa average niining 25.2 points, 5.0 assists ug 4.1 rebounds, samtang ikalima si Kyrie Irving sa Boston Celtics nga miposte og 24.1 points, 5.0 assists ug 3.6 rebounds.
Nagkompleto sa top 10 mao sila si LeBron James sa Cleveland Cavaliers, Giannis Antetokounmpo sa Milwaukee Bucks, Russel Westbrook sa Oklahoma City Thunder, Jimmy Butler sa Minnesota Timberwolves ug LaMarcus Aldridge sa San Antonio Spurs.
- Latest