Splash brothers nanginit
CEBU, Philippines — Gipakita nila ni Klay Thompson ug Stephen Curry nga sila gihapon ang premyadong ‘guard tandem’ karon sa NBA human ang gitawag nga “Splash Brothers” nagkumboya’g 68 puntos alang sa 119-112 nga kadaogan sa Golden State Warriors batok Chicago Bulls kagahapon didto sa United Center sa Chicago, Illinois.
Ang Warriors miinat karon sa ilang road game winning-streak ngadto sa 14 ka duwa.
Si Klay Thompson mipuntos og 38, samtang si Curry mitira og 30 puntos alang sa Warriors.
Tungod sa init nga opensa sa duha, si coach Steve Kerr mihatag og taas nga pahuway sa star player nga si Kevin Durant nga mihimo gihapon og 19 puntos.
Ang Warriors nga nag-una sa overall standing sa ilang 37-9 win-loss record, miduwa nga wala sila si Draymond Green ug Andre Iguodala tungod sa injury.
Didto sa Chesapeake Energy Arena sa Oklahoma City, ang Thunder milubong sa Los Angeles Lakers sa iskor nga 114-90 sa pagpangulo ni veteran star Carmelo Anthony nga mirehistro og 27 puntos.
Kini ang ikatulong sunod-sunod nga daog sa Thunder nga gibidahan usab ni Steven Adams nga adunay double-double sa iyang 21 puntos ug 10 ka rebounds, samtang si Russell Westbrook adunay 19 puntos.
Ang pilderong Lakers nga miduwa nga wala ilang sinaligang rookie nga si Lonzo Ball nga padayong nagpaalim sa injury sa iyang kamot.
Sa uban pang mga resulta, ang Atlanta Hawks nakaipsot sa New Orleans Pelicans, 94-93, ang San Antonio Spurs mipilde sa Brooklyn Nets, 100-95, ang Los Angeles Clippers nakaeskapo bitbit ang 109-104 batok sa Denver Nuggets.
Midaog sab ang Toronto Raptors batok sa Detroit Pistons, 96-91, gilubong sa Charlotte Hornets ang Washington Wizards, 133-109 ug ang Miami Heat mipakaging sa Milwaukee Bucks sa iskor nga 106-101 (BANAT)
- Latest