Celtics, Timberwolves nangapukan

CEBU, Philippines — Nangabugnaw ang duha sa labing init nga teams sa NBA nga mao ang Boston Celtics ug Minnesota Timberwolves.

Didto sa Boston, si Anthony Davis miburak og 45 puntos ug milangkat og 16 ka rebounds aron pangulohan ang 116-113 nga kadaogan sa New Orleans Pelicans sud sa overtime batok sa Celtics, kansang pito ka sagunson nga daog naputol.

Si DeMarcus Cousins midugang og 19 puntos ug 15 ka rebounds, samtang si Jrue Holiday mitapos uban ang 23 puntos ug pito ka assists.

Wala sab magpabitin si Ian Clark nga dunay 15 puntos alang sa Pelicans nga namaneho pagdaog human mikagar ang 3-point shooting sa Celtics sa dugang singko minutos sa ilang kumbati.

Si Kyrie Irving maoy nangu sa Boston uban ang 27 puntos, samtang si Al Horford dunay 14 puntos ug siyam ka rebounds.

Sila si Marcus Smart ug Jaylen Brown mitali og 16 puntos matag usa alang sa Celtics nga mitali og season-high 50 ka tres.

Ang Celtics mao pa unta ang naglabaw sa iskor nga 113-110, apan si Cousins milansang sa iyang jumper ug dayon si Holiday mipasud sa duha niya ka field goals aron pagsilyo sa kadaogan sa Pelicans nga duna na karo’y 23-20 record.

Ang Celtics nakatilaw sa ika-11 pa lamang nilang pilde nga giatbangan og 34 ka daog.

Didto sa Orlando, Florida, si Evan Fournier mirehistro og season-high 32 puntos sa dihang gisanta sa Magic ang lima ka sunod-sunod nga daog sa Timberwolves, 108-102.

Si D.J. Augustin mitampo og 11 puntos ug tulo ka assists sa katapusang kuwarter diin ang Magic mirapido og 35 puntos nga maoy nahimo nilang hagdanan sa kalampusan.

Si Bismack Biyombo mihipos og 16 puntos alang sa Magic, nga mitali sa ika-13 pa lamang nilang daog sa 44 ka duwa.

Si Jimmy Butler dunay 28 puntos ug pito ka rebounds, apan wa’y nahimo sa habig sa Timberwolves nga nahagba ngadto sa 29-17. (BANAT NEWS)