Pacquiao vs. Lomachenko?
CEBU, Philippines — Posibleng madayon ang ‘comeback’ fight ni Pinoy boxing icon Manny Pacquiao karong tuiga kay siya mismo ang mipahibalo nga nakignegosasyon siya tali sa kampo ni pound-for-pound king Vasyl Lomachenko.
Ang 39-anyos nga si Pacquiao nga nangita pa gihapon og kontra alang sa iyang ‘comeback fight’ karong tuiga, miingon nga usa si Lomachenko, ang kasamtangang WBO super featherweight champion sa gusto niya atubangon karong Abril.
“There are negotiations now about the number one pound-for-pound (boxer) which is Lomachenko,” matud pa ni Pacquiao sa ABS-CBN Sports.
Ang kanhi WBO welterweight champion nga si Pacquiao nagkanayon nga kun magkasinabot, posible nga mahimong usa ka ‘catch-weight’ ang sangka tungod kay mas ubos og timbang si Lomachenko itandi kaniya.
Giisip nga labing maayong boksidor karon, si Lomachenko adunay rekord nga 11-1, 8KOs.
Sa katapusan niyang away niadtong Disyembre, iyang gipaundang si Cuban star Guillermo Rigondeaux. Gawas nga usa ka boxing champion, ang 29-anyos nga si Lomachenko usa sab ka two-time Olympic gold medalist.
Si Pacquiao nga adunay rekord nga 59-7, mitug-an nga gamay na lang ang nahibiling panahon sa boxing ug gusto niya nga pilion og tarung ang iyang mga ikasangka nga kinahanglan usa ka sikat nga boksidor.
Nasayran, gihagit usab ni Pacquiao sa usa ka boxing match ang Mixed Martial Arts superstar nga si Conor McGregor nga nakigsangka ni Floyd Mayweather Jr., apan napilde.
Laing mga pangan nga gustong sangkaon ni Pacquiao mao si Amir Khan, Terence Crawford o rematch batok ni Jeff Horn, kinsa mipilde kaniya sa miaging tuig pinaagi sa usa ka controversial unanimous decision didto sa Australia. (BANAT NEWS)
- Latest
