PABC nanghawod sa 8th Cebu Amateur Boxing
CEBU, Philippines — Gidominahan sa mga boksidor sa Philippine-Australian Boxing Club ang ikawalong edisyon sa Cebu Amateur Boxing Revival sa miaging gabii didto sa Gaisano Tabunok grounds, Talisay City.
Nangulo sa ratsada sa PABC si JM Andejas, kinsa midaog pinaagi sa split decision batok ni Eric Miguel Austria sa A Gym sa kids/ novice 40kgs. class. Si Alex del Rio mipaundang ni Justin Alesrisa sa Cebu City Sports Center Gym sa ilang sangka sa 45 kgs. division, samtang si Roque Villagonzalo midaog pinaagi sa puntos batok ni Jake Tabano sa 10,000 Boxing Club ubos sa 46 kgs. class.
Si Jimpol Dignos mikulata ni Clark Sanchez sa A Gym sa 48 kgs. division, samtang si Godfrey Libiano midaog batok sa boksidor sa Big Yellow boxing Club.
Mokompleto sa lista sa mga midaog mao sila si JM Casinto batok Daniel Avila, Leonlie Apostel batok Lester Secretaria, Rowell Nocos batok Will dela Cruz, Jimboy Cale batok Mardey Cardeno ug Eduardo Jimenez batok John Niño Vega.
Ang sunod edisyon sa maong amateur boxing tournament ipahigayon karong Domingo didto sa Gaisano Country Mall sa Barangay Banilad, dakbayan sa Sugbo.
- Latest
