Pelicans nakaipsot sa Knicks

CEBU, Philippines — Mitala  og  season-high 48 points ang All-Star bigman nga si Anthony Davis alang sa New Orleans Pelicans  nga midaog pinaagi sa overtime  batok sa  New York Knicks, 123-118  sa nagpadayong aksiyon sa National Basketball Association kagahapon  sa Madison Square Garden.

Ang Pelicans gilubong og 19 puntos sa uwahing bahin sa third period, apan si Davis miwadwad og maayo  aron makabangon iyang koponan. Ang Pelicans nga dugay na wala kasulod sa playoffs, kasamtangan nga anaa sa ikaunom nga dapit sa Western Conference uban ang 22-20 nga baraha.

Sila si Kristaps Porzingis ug Tim Hardaway ang nangulo sa Knicks sa ilang 25 puntos matag usa. 

Didto sa Target Center, ang hometeam  Minnesota Timberwolves mipalig-on sa ilang kupot sa ikaupat nga dapit sa Western Conference sa record nga 29-16 dihang ilang gilubong ang Portland TrailBlazers 120-103. 

Si Karl Anthony Towns nangulo sa Wolves sa iyang 20 puntos ug 11 ka rebounds nga maoy labing daghan nga double-double karon nga season.

Sa ubang mga resulta, gilat-an sa Miami Heat ang Milwaukee Bucks, 97-79 ug gilubong sab sa Indiana Pacers ang Phoenix Suns sa iskor nga 120-97.