Warriors, Cavs mag-abot karon

CEBU, Philippines — Mag-abot na sab karon ang defending champion Golden State Warriors batok sa naglungot-lungot nga karibal  Cleveland Cavaliers sa National Basketball Association didto sa Quicken Loans Arena sa Cleveland, Ohio.

Ang Cavs nakasinati na og tulo ka  sagunsong pilde ug maisip nga  bug-at nga bagahi ang pas-anon nila sa ilang pakigharong sa  Warriors nga aduna na’y walo ka  sunod-sunod  nga  daog.

Ang  Warriors nga midaog sa miaging finals batok sa Cavs, gitan-aw gihapon nga usa ka  lig-ong title contender karon nga season bisan pa sa pagsulbong sa ubang lig-on nga koponan sa Western Division. 

Nag-una sila sa overall standing  sa ilang 35-9 nga baraha.

“Obviously, with our history with Cleveland, you want to get a win,” matud pa ni Warriors coach Steve Kerr sa NBA.com.  

Lahi ang gidangatan karon sa defending Eastern Conference champion nga Cavs  kay naglisud na ilang star player nga si LeBron James sa pagdala sa koponan tungod sa kakuwang sa suporta. Ang Cavs adunay 26-16 win-loss record ug ikatulo sa Eastern Conference.   Kuyaw pa sila nga maapsan sa Miami Heat nga nagpahipi  sa ikaupat sa 25-17   record.

“My players need to be up for the challenge,” matud pa ni Cavs coach Tyron Lue. “If not, it’ll be embarrassing.”

Sa una nilang sangka niadtong Disyembre 26 sa miaging tuig, ang Warriors  midaog sa Cavaliers sa iskor nga  99-92.