Donaire mag-ensayo sa Sugbo

CEBU, Philippines — Anhi sa Sugbo mopahigayon sa iyang training camp si  kanhi  Pinoy boxing champion Nonito ‘The Filipino Flash’ Donaire Jr. pangandam sa umaabot niyang away batok  ni kanhi world champion Carl Frampton sa bulan sa Abril 21 didto sa Ireland.

Si Donaire gusto nga mag-ensayo og maayo alang sa maong sangka ug usa ang Sugbo  sa mga lugar  iyang gisaytan  nga pahigayonan sa training. Gawas sa Sugbo, magbansay-bansay sab siya didto sa Las Vegas, Los Angeles ug Tokyo.

Gitug-an niya nga kun mahitabo iyang Cebu camp, posible nga adto siya sa sikat nga ALA Boxing Gym ni boxing patron Antonio Aldeguer.  

Posible sab niya  maka-sparmate   si   No. 2  ranked WBO featherweight Mark Magsayo.

Bisan og dili title fight, si Donaire miingon nga mahinungdanon  ang maong away alang sa iyang karera tungod kay ang kadaogan  mohatag kaniya og kahigayonan nga moaway og balik alang sa kalibotanong bakus.

Ang 35-anyos nga si Donaire adunay rekord nga 38-4, 24KOs. Siya ang kanhi WBO super bantamweight champion, apan nahanaw kini human mapilde ni Jessie Magdaleno niadtong  2016. 

Misaka siya sa featherweight ug nasakmit niya ang WBC silver title batok ni Ruben Hernandez pinaagi sa unanimous decision niadtong  Septiyembre.