Kia maayong pagkalubong
CEBU, Philippines — Wala mipakita og kaluoy ang Alaska Aces ug gipun-an ang kalbaryo sa Kia Picanto dihang ila kining gilubong og tagaliog,102-65 sa nagpadayong PBA Philippine Cup kagabii didto sa Smart Araneta Coliseum.
Ang Aces nga misakmit sa ikaduha nilang sunod-sunod nga daog mipahamtang sa Picanto sa ika-15 nilang nagkadinang pilde nga nagsugod pa sa miaging season. Nagbitbit na sila karon og 0-4 og kuli na kaayo nga makasulod pa sa playoffs.
Nagkamang ang scoring sa sayong bahin sa duwa diin milabaw og uno punto ang Kia paghuman sa unang 12 minutos sa duwa sa iskor nga 21-20, Apan ang Alaska mibundak sa ilang alas pinaagi sa nagpungasi nga opensa sa third period diin milusad sila og bangis nga 36-5 scoring rally alang sa 75-39 nilang bentaha paghuman sa maong kuwarter.
Nangulo sa maong rally mao ang rookie nga si Jeron Teng ug si Chris Banchero nga nakahatag og labad sa depensa sa Kia.
Si Teng maoy topscorer sa Alaska nga midiga og 23 puntos, samtang laing lima niya ka teammates ang mirehistro og double-figures.
Si Carl Bryan Cruz mihirit og 16 puntos, gisundan ni Banchero sa iyang 11 puntos, sila si Calvin Abueva, Vic Manuel ug Jake Pascual mitampo’g 10 puntos. matag usa alang sa Alaska.
- Latest