Marinerong Pilipino hari sa Sinulog Cup
CEBU, Philippines — Miagi pa og overtime ang Marinerong Pilipino batok sa Cebu Landmasters/Bogo, 89-80 aron masakmit ang kampiyonato sa Cebu City Sinulog Cup 2018-Basketball Invitational sa miaging gabii diha sa Cebu Coliseum.
Sikit ang duwa nga miresulta sa walo ka panagtabla sud sa second half sa wala pa misangpot ang duwa sa overtime.
Labaw og kuwatro puntos ang Marinerong Pilipino paingon sa final period, 54-50, apan mi- rally ang Landmasters nga gibitoonan og mga beteranong magduduwa hinungdan sa overtime.
Sa dugang singko minutos, milabaw ang Landmasters og tres puntos sa iskor nga 79-76, apan si PBA D-League standout Mike Ayonayon mitusak og duha ka sunod-sunod nga tres sa krusyal nga minuto sa duwa nga naghawan sa dalan sa kadaogan.
Si Ayonayon nga mirehistro og 32 puntos ug walo ka rebounds maoy gibayaw isip most valuable player. Mitampo og 15 puntos si Renzo Subido, samtang si Billy Robles adunay 12 alang sa bisitang Marinerong Pilipino.
Si Ferdinand Lusdoc maoy topscorer sa pilderong Landmasters sa iyang 28 puntos.
Sa sayo pa, ang University of Cebu/M.Lhuillier misakiyo sa third place trophy pinaagi sa paglubong sa University of San Jose- Recoletos /May Abuhan sa iskor nga 84-72.
- Latest