Kia mangandoy og daog

CEBU, Philippines — Laraw sa Kia Picanto nga  putlon ang nagkutay nilang 15 ka pilde sa ilang sangka batok sa Alaska Aces  karong adlawa sa  PBA Philippine Cup didto sa Smart Araneta Coliseum.

Ang duwa sugdan  sa alas-4:30 sa hapon.

Nasayran, ang Kia wala pa katilaw og daog sugod pa sa miaging season. Katapusan nilang pilde gikan sa mga kamot sa   Magnolia Hotshots diin gilat-an sila sa iskor nga  77-124. 

Ang bag-ong coach sa Kia nga si Ricky Dandan miangkon nga lisud iyang trabaho tungod kay gawas sa mga bag-o niyang players, dili sab sila kabuwelo batok sa ubang lig-ong koponan.

Ang kontrobersyal nga Kia adunay sobra sa lima ka bag-ong players resulta   kini   sa  pag-trade nila sa ilang No. 1 pick nga si Chris Standhardinger ngadto sa San Miguel Beermen nga mihatag kanila og upat ka players.

Ang Kia nga 0-3 sa pagsugod karon nga season, mao na ang naghupot sa labing taas nga losing-streak diin nalabwan nila ang 14 ka sunod-sunod sa Welcoat (karon Rain or Shine Elasto Painters).

Sa ilang bahin, ang Alaska wala’y labot kun malugwayan nila ang losing-streak sa Kia tungod kay gusto usab nila nga makuha ang ikaduha nilang sunod-sunod nga daog sa conference human sila midaog batok sa Meralco sa miaging semana.

Sa main game sa alas-6:45 sa gabii, ang Magnolia makigsangka sa NLEX Road Warriors.