James, Curry mao na’y nag-una sa All-Star voting
CEBU, Philippines — Nakuha og balik nilang LeBron James sa Cleveland Cavaliers ug Stephen Curry sa Golden State Warriors ang nag-unang puwesto sa gipahigayong botasyon alang sa NBA All-Star Game.
Si James mitali og 1,622,838 botos human sa ikaduhang hunat sa botasyon aron mag-una sa Eastern Conference. Iyang nalabwan si Giannis Antetokounmpo sa Milwaukee Bucks nga dunay 1,480,954 ka boto.
Samtang si Curry nakahakot og 1,369,658 botos aron mangulo sa Western Conference. Iyang nabiyaan ang teammate niyang si Kevin Durant nga dunay 1,326,059 botos.
Hinuon, nagpabiling top front court si Durant sa West ug gisundan kini ni Anthony Davis sa New Orleans Pelicans nga dunay 664,687 botos.
Si James Harden sa Houston Rockets maoy nagsunod ni Curry isip top guard sa West nga adunay 978,540 botos.
Sa East, ang haring gangis sa mga guwardiya mao si Kyrie Irving sa Boston Celtics kortesiya sa 1,370,643 niya ka boto, samtang si DeMar DeRozan sa Toronto Raptors maoy ikaduha uban sa iyang 537,168 botos.
Ang 67th NBA All-Star Game mahitabo karong Pebrero 18 didto sa Staples Center sa Los Angeles, California.
- Latest
