Gilat-an na sab

CEBU, Philippines — Nakatilaw sa labing makauuwaw nga kapildihan  karon nga season si LeBron James ug  ang Cleveland Cavaliers human sila gilubong sa Toronto Raptors, 133-99 sa NBA kagahapon didto sa Air Canada Centre sa Toronto, Canada.

Ang Cavaliers natagak ngadto sa 6-8 sukad sila gipayaka sa Golden State Warriors niadtong adlaw sa Pasko.

Si James miiskor lamang og 26 puntos, samtang si Isaiah Thomas nasipyat sa nag-una niyang 11 ka itsa  ug nakahimo lang og kuwatro puntos sud sa 24 minutos niya nga pagduwa.

Human gibalhiboan sa Minnesota Timberwolves niadtong Martes, 127-99, mas grabe pa kagidlay ang Cavs  kay gilubong sila og 34 puntos sa Raptors.

Si Fred VanVleet mikadlit og career-high 22 puntos, samtang si Jonas Valanciunas mipupo og 15 puntos ug 18 ka rebounds alang sa Raptors nga mangtas gihapon bisan og wala ka duwa ang duha nila ka starters nga sila si Kyle Lowry ug Serge Ibaka.

Misalida sab sila si C.J. Miles, Pascal Siakam, Norm Powell ug DeMar DeRozan nga nagkumboya’g  57 puntos alang sa Raptors.

Si VanVleet miposa og unom ka 18 ka tres nga gibomba sa Raptors batok sa Cavs.

Human miabante og sayes puntos sa unang kuwarter, 30-24, misamot pa og kabangis ang Raptors aron pagposte og 65-40 nga labaw sa halftime.

Si DeRozan mikabkab  dayon og 11 puntos sa ikatulong kuwarter aron pagpaburot sa ilang labaw ngadto  sa 28 puntos, 100-72 sa katapusang 10 minutos sa aksiyon.

Wala na makahaw-as pa ang Cavs sa maong lawom nga kawot nga ilang nalubngan.

Ang Raptors nagbitbit na karon og 29-11 record, samtang ang Cavs nadakin-as ngadto sa 26-15.

Sa laing duwa, si Jaylen Brown mitimbre og 21 puntos ug si Kyrie Irving midugang og 20 puntos, pito ka assists ug unom ka rebounds sa dihang gipakaging sa Boston Celtics ang Philadelphia 76ers, 114-103.

Si Marcus Morris mitampo og 19 puntos, samtang sila si Jayson Tatum ug Al Horford nakatigum og 29 puntos alang sa Celtics nga miinat sa labing nindot nga rekord sa Eastern Conference ngadto na sa 34-10.