E&F Surplus pabiling wala matarog

CEBU, Philippines — Nangigo og maayo gikan sa 3-point area si Fury  Trazona, samtang si Tingan Gestopa nagmangtas sa fourth quarter nga maoy  nahimong hagdanan sa E&F Surplus aron makab-ot ang ikawalo nilang sunod-sunod nga daog sa 10th J&J Surplus Ballclub basketball tournament.

Ang team owner nga si Trazona miarangkada og 25 puntos aron pangulohan ang iyang koponan, samtang si Gestopa miratsada og 18 puntos sa E&F Surplus  nga   hapit   madisgrasya ngadto sa Purok Gemilina sa ilang duwa sa iskor nga 102-94  niadtong Miyerkules sa gabii didto sa GT Academy gym sa Tayud, Lilo-an.

Ligas kaayo ang aksiyon gikan sa pagsugod ug didto na nakaginhawa og lawom ang E&F Surplus sa third period dihang nangigo gikan sa 3-point arc si Trazona nga nagduslit sa mainiton nilang rally  uban ni Igoy.

Ang E&F Surplus wala gihapon matarog sa ilang nahimutangan uban ang 8-0 win-loss record.

Namuntos sab og maayo si Gestopa sa fourth period nga nakahatag og danyos ngadto sa Purok Gemilina.

Ang Purok Gemilina gipangulohan nilang Bolande ug Caparroso nga nagkumboya’g 43 puntos.

Sa laing duwa, si Remegio Adolfo miposa’g upat ka tres sa fourth quarter alang sa J&J Surplus nga bisan tuod og unom ra sila, nakahimo gihapon sa pagdaog batok sa RCRM Hardware, 95-86.

Si Adolfo miburak og  29 puntos aron pangulohan ang J&J Surplus ni ballclub president Henry Agbon, laing upat niya ka teammates ang miiskor sab og double figures. Ang RCRM Hardware gipangulohan ni Dennis Noval pinaagi sa iyang 21 puntos.

Sa sayo pa, ang Domz Auto Supply ni Domz Mercader mitiklo sa D’ Assassins, 90-79 ubos sa liderato ni Terrence Cadao nga mikulit og 36 puntos.

Si John Kark miposa og 26 puntos aron pangulohan sab ang D’ Assassins.

Ang liga ubos sa superbisyon ni commissioner Fury Trazona sa abag nilang Ranil Pepito, Junry Barrita ug Choy Pilapil.

PUNTOS MATAG USA

Unang duwa:

DOMZ (90) – Cadao 36, Arevalo 24, Icot 15, Domz 4, J. Oyao 4, Jugalbot 3, Oyao 2, Uy 2.

D. ASSASSINS (79) – Quinaging 26, Mangubat 15, Soco 13, Jugalbot 10, Soco 9, Jugalbot 4, Perseverancia 4, Normandia 3, Pepito 2, Jugalbot 2.

Ikaduhang duwa:

E&F Surplus (102) – Trazona 25, Gestopa 18, Igoy 17, A. Pepito 9, Betinol 8, Ponce 6, A. Sabang 6, Tranghia 5, Caballos 4, Pepito 6.

PUROK Gemilina (94) – Bolande 29, Caparroso 14, C.J. 10, Decoy 9, Rudson 7, Aton 7, Orque 6, Dave 5, Macmac 2, Roy 2.

Ikatulong duwa:

J&J Surplus (95) – Adolfo 29, Dela Rama 18, Tiwan 18, Oroyan 16, Herra 12, Astillero 3.

RCRM Hardware (86) – D. Noval 21, Aller 20, Sanico 10, Berandal 9,  J. Noval 8, Lauron 8, Granada 6, Albarico 2, Ore 2.