Isaiah Thomas gipamulta $20T
CEBU, Philippines — Ang star sa Cleveland Cavaliers nga si Isaiah Thomas gipamulta og $20,000 (P1 million) sa NBA human siya ma-ejected gumikan sa paghapak sa liog ni Andrew Wiggins sa Minnesota Timberwolves.
Gipalayas sa korte si Thomas sa dihang ang Cavs gikulata sa Timberwolves, 127-99 niadtong Martes sa dihang iyang gihampak ang iyang kamot sa liog ni Wiggins sa ikatulong kuwarter.
Diha-diha gitawgan siya og ‘flagrant foul 2’ hinungdan nga na-ejected kini.
Human sa duwa, si Thomas miinsister nga wala niya tuyoa nga hapakon si Wiggins sa liog.
Sa laing bahin, ang NBA mipahibawo nga si James Johnson sa Miami Heat ug Serge Ibaka sa Toronto Raptors gisuspenso og usa ka duwa nga wa’y bayad gumikan sa pagsinukliay nila og kumo.
Ang duha ka mga basketbolista nagsinukmagay atol sa 90-89 nga kadaogan sa Heat batok sa Raptors didto sa Air Canada Centre niadtong Miyerkules.
Sa maong duwa, nagkasungi sab sila si Demar DeRozan sa Raptors ug Goran Dragic sa Heat.
Nunot niini, si DeRozan gipamulta og $25,000, samtang si Dragic gipabayad og $10,000.
- Latest