Lou Williams nagmangtas

CEBU, Philippines — Mitala og career-high 50 points si Lou Williams  sa dihang gilat-an  sa Los Angeles Clippers ang defending champion Golden State Warriors, 125-106  sa NBA kagahapon didto sa Oracle Arena sa Oakland, California.

Ang Warriors naglabaw kadiyot og nuybe puntos sa ikatulong kuwarter, apan si Williams mirapido og 27 puntos sa maong kuwarter aron paghatag sa Clippers og siyete puntos nga bentaha, 97-90 paingon  sa  final period.

Wala na maka-rekober pa sukad niadto ang Warriors gumikan kay misamot pa og kamangtas ang Clippers, kansang labaw miburot ngadto sa 20 puntos.

Impresibo kaayo ang gipakitang salida sa Clippers kay nakamaneho sila pagtali  og 125 puntos bisan og wala makaduwa ang upat ka sinaligan nilang si Blake Griffin, Patrick Beverley, Danilo Gallinari ug Austin Rivers.

Bugtong maanindot nga talan-awon sa Warriors mao si Kevin Durant nga mipabuto og 40 puntos, apan wala kini igong suporta gikan nilang Stephen Curry ug Klay Thompson hinungdan sa ilang pagkahagba.

Ang Warriors nakatilaw sa ikasiyam pa lamang nilang pilde nga giatbangan og 33 ka daog, samtang ang Clippers nagbitbit na og 19-21 nga baraha.

Sa laing aksiyon, si Jimmy Butler mibugha og 26 puntos ug walo ka assists sa dihang gilubong sa Minnesota Timberwolves ang nagkagidlay nga Oklahoma City Thunder, 104-88.

Si Andrew Wiggins midugang og 19 puntos, samtang si Karl-Anthony Towns mihipos og 18 puntos ug 12 ka assists alang sa Timberwolves nga pabiling nanginit duha ka adlaw human gipukan ang Cleveland Cavaliers.

Sila si Carmelo Anthony ug Paul George nagkumboya’g 28 puntos, apan wa’y nahimo gumikan kay nasagunsonan og tulo ka pilde ang Thunder. Mao kadto ang ikalima nga pilde sa katapusan nilang pito ka duwa hinungdan sa ilang pagkahagsa ngadto sa 22-20.

Didto sa Houston, si Chris Paul mikulit og season-high 37 puntos uban ang 11 ka assists, pito ka rebounds ug tulo ka steals aron aswaton ang Rockets ngadto sa 121-112 nga kadaogan batok sa Portland TrailBlazers.

Si Eric Gordon mitampo og 30 puntos alang sa Rockets nga midaog sa ikaduhang sunod-sunod nga higayon bisan og wala pa kabalik og duwa ang injured nilang bitoon nga si James Harden.

Mikuha sab og atensiyon si Tyreke Evans human kini miratsada og 28 puntos ug ingon man si Marc Gasol nga miduslit og 21 puntos ug 10 ka rebounds aron pagsalbar sa Memphis Grizzlies batok sa New Orleans Pelicans, 105-102.