Thunder napilde sa Trailblazers
CEBU, Philippines — Bisan wala moduwa ilang star player nga si Damien Lillard, ang Portland TrailBlazers nakahimo gihapon sa pagbuntog sa Oklahoma City Thunder, 117-106 sa ilang duwa sa National Basketball Association (NBA) kagahapon didto sa Chesapeake Arena sa Oklahoma City.
Ang three-point shooter nga si CJ McCollum mipabuhagay og 27 puntos, samtang ang sophomore nga si Shabazz Napier mikadlit og 21 puntos aron pangulohan ang TrailBlazers nga mipahilom sa mga fans sa Thunder.
Sa maong kadaogan, nailog sa TrailBlazers ang ikalimang dapit sa Western Conference standing sa ilang 22-18 record, samtang ang Thunder natagak sa ikaunom bitbit ang 22-19 nga baraha.
Misalida ang “Big Three” sa Thunder diin miiskor og 22 puntos matag usa sila si Russell Westbrook ug Paul George, samtang si Carmelo Anthony mitampo’g 19 puntos, apan dili paigo ang ilang paningkamot aron modaog.
Didto sa Toronto, Canada, giputol sa Miami Heat ang 12-game home winning streak sa Raptors human makaipsot sa kulbahinam kaayo nilang duwa nga nagdaog lang og uno punto sa iskor nga 90-89 pinaagi sa game-winner ni Wayne Ellington sa himalatyong segundos sa duwa.
Nangulo sa Heat ni Fil-American coach Erik Spoelstra mao si Goran Dragic nga adunay 24 puntos, samtang ang rookie nga si Bam Adebayo mihimo og 16 puntos.
Sa ubang mga resulta, ang Dallas Mavericks milubong sa Orlando Magic, 114-99, sa pagpangulo ni Dirk Nowitzki nga mikamada og 20 puntos, samtang gilumsan sab sa Los Angeles Lakers ang Sacramento Kings sa iskor nga 99-86. (BANAT NEWS)
- Latest
