Kapin sa 400T premyo sa Cebu Marathon 2018
CEBU, Philippines — Moabot ngadto sa P419,000 ang giandam nga ganting salapi alang sa mga mananaog sa Cebu Marathon 2018 nga mosikad karong Domingo diha sa Cebu Business Park.
Si Cebu Executive Runners Club (CERC) president Kenneth Casquejo nagkanayon nga mas dako karon ilang ganting salapi itandi sa miaging tuig.
Mohatag sila og ganting salapi sa tanang dibisyon ilabi na sa top three finishers sa 42K foreign category ug top 10 male ug female sa local class. Mahatagan usab og ganting salapi ang top five sa 21K, 10K ug 5K.
Nasayran nga nalabwan na nila ang numero sa mga partisipante sa miaging edisyon. Gikan sa 4,000 sa miaging tuig, misaka na karon sa kapin 5,000 ang mga nagparehistro sa giisip nga usa sa mga labing prestihiyosong lumba sa nasud.
Dugang pa ni Casquejo nga mas alegre ang lumba sa mga runners tungod kay bibo ang rota nga ilang agian. Adunay lamian nga post-race meal alang sa mga partisipante lakip niini ang Cebu lechon. Nagpaabot usab sa finish line ang mga lootbags ug mga surprisa alang sa mga runners. (BANAT NEWS)
- Latest
