E&F Surplus pabiling nag-una sa standing
CEBU, Philippines — Padayon nga nagsolo sa liderato ang E&F Surplus human midaog batok sa RCRM Hardware, 104-89 sa nagkainit nga aksiyon sa 10th J&J Surplus Ballclub basketball tournament niadtong Sabado sa gabii didto sa GT Academy gym sa Tayud, Lilo-an.
Ang team owner nga si Fury ‘Triggerman’ Trazona mao gihapon ang nangulo sa koponan nga miarangkada og 23 puntos.
Natakdan sab sa iyang kamangtas si Anton Tranghia nga miratsada og 20 puntos sa E&F Surplus nga wala pa’y pilde sa pito ka duwa.
Sila si Tingan Gestopa ug Tata Betinol nagkumbinar og 30 puntos sa E&F Surplus nga maoy mikontrolar sa tibuok duwa.
Ang E&F Surplus labaw og kuwatro puntos sa first period, 23-19, apan milabyog kini sa second quarter aron bingaton ang ilang labaw ngadto sa 58-41 sa halftime.
Upat sab ka players sa RCRM Hardware nilang coach Bembem Embrado ug Gilbert Llanos ang miiskor og double figures pinangulohan ni Lauron nga mihakot og 23 puntos, gisundan ni Bernadal nga adunay 18 puntos, samtang sila si Rodulfo Granada ug R. Noval mitampo’g 12 ug 10 puntos matag usa alang sa napildeng koponan.
Sa laing aksiyon, ang Domz Auto Supply mikulit sa ikaduha nilang daog human makaipsot batok sa Purok Gemilina sa iskor nga 85-81.
Gipangulohan ni Terrence Cadao ang Domz Auto Supply nga mikadlit og 26 puntos, laing upat niya ka teammates ang miiskor og double figures ug usa na niini ang team owner nga si Domz Mercader nga miariya og 11 puntos.
Nangulo sa Purok Gemilina mao sila si Bolande ug Caparroso nga nagkumboya’g 36 puntos.
Labaw unta ang P. Gemilina sa halftime, 43-38, apan mibahar ang ilang opensiba sa third period hinungdan nga naligsan sila sa Domz Auto Supply nga wala na molingi human mailog ang dos puntos nga bentaha, 59-57 paingon sa fourth quarter.
Ang Domz Auto Supply ug Purok Gemilina parehong nagbitbit og 2-6 nga baraha ning maong liga nga nahimo ubos sa pagtugot sa presidente niining si Henry Agbon, kansang team nga J&J Surplus midaog batok sa Assassins pinaagi sa ‘default’.
Ang J&J Surplus mipahiluna sa ikaduhang dapit sa standing uban ang 7-1 win-loss record, samtang ang Assassins ni team captain Allen Jugalbot bokya pa sa walo ka duwa.
Ang mga duwa gipadagan ni league commissioner Fury Trazona sa abag nilang Ranil Pepito, Norman Tisoy, Harry Espante ug Choy Pilapil.
Puntos matag usa
Unang duwa:
E&F Surplus (104) – Trazona 23, Tranghia 20, Gestopa 19, Betinol 11, A. Sabang 8, Igoy 8, Nuñez 5, Caballes 3, A. Pepito 2, Ponce 2, K. Sabang 2.
RCRM (89) – Lauron 23, Bernadal 18, Granada 12, R. Noval 10, Ore 9, Noval 7, Aller 4, Daragosa 2, Albarico 2, D. Noval 2.
Ikaduhang duwa:
DOMZ (85) – Cadao 26, Icot 16, Arevalo 12, Domz 11, Baring 11, Oyao 3, Jugalbot 2, J. Oyao 2, Uy 2.
P. Gemilina (81) – Bolande 25, C.J. 15, Caparroso 11, Orque 9, Decoy 8, Junry 4, Loloy 4, Rudson 4, Gaming 2. (BANAT NEWS)
- Latest