Cebu mo-host world bodybuilding championships
CEBU, Philippines — Sa labing unang higayon, ang Pilipinas mo-host sa NAC World Bodybuilding and Fitness Championships dinhi sa dakbayan sa Sugbo karong Mayo 31 hangtod sa Hunyo 3 diha sa IC3 Convention Center.
Matud pa ni Dennis Delgado sa Workout Fitness Center nga mga atleta gikan sa kapin sa 40 ka nasud sa nagkadaiyang dapit sa kalibotan ang mipadayag na sa ilang interes nga mosalmot sa maong upat ka adlaw nga kompetisyon.
Gawas sa host Philippines, ang lain pang mga nasud nga mosalmot mao ang Belgium, Estonia, France, Greece, Hungary, India, Indonesia, Iran, Israel, Italy, Kuwait, Latvia, Lithuania, Malaysia, Netherlands, New Zealand, Norway, Poland, Romania, Russia, Slovakia, Spain, Turkey, Ukraine, United Kingdom, Germany, China, Japan ug Korea.
Nagkanayon si Delgado nga matag nasud gitugotan nga mopadala og 18 ka mga entrante gumikan kay 18 man sab ka mga kategoriya ang kumbatihan.
Mao kini ang labing unang higayon sud sa 12 ka tuig nga ang maong kalihukan anhi mahitabo sa Asya. Sagad kini ipahigayon didto sa Uropa.
Gipadayag ni Delgado nga mahinayon gyud kini sa nasud gumikan sa hugtanong suporta ni SeaAir CEO Patrick Tan ug sa Yupangco Group of Companies.
Gawas sa wa’y puas nilang promosyon sa bodybuilding, ila sab kini gituyo isip gamay nilang paagi aron makatabang sa turismo sa nasud. (BANAT NEWS)
- Latest
