Thomas, Celtics nagkauli na
CEBU, Philippines — Bisan wala siya kaduwa batok sa kanhi niya team nga Boston Celtics, mabungahon gihapon ang pagtaak og balik ni All-Star Isaiah Thomas didto sa TD Center human siya ug ang mga kadagkoan sa Celtics nagkauli sa maayong kabubut-on.
Nahiubos pag-ayo si Thomas ngadto sa Celtics management tungod sa pag-trade kaniya sa Cleveland Cavaliers bugti ni Kyrie Irving bisan pa og gitabangan niya ang koponan nga makuha ang No. 1 spot sa Eastern Conference sa miaging season. Gipasaylo na ni Thomas ang mga kadagkoan sa Celtics, ilabi na si team president Danny Ainge nga maoy miuna og duol kaniya kagahapon.
Sa iyang bahin, si Celtics coach Brad Stevens nagkanayon nga bisan pa og atua na sa Cleveland, giisip gihapon niya si Thomas nga suod niya nga higala ug dako iyang respeto sa kanhi niya point guard nga nahimo niyang sinaligan sa milabay nga mga season.
Si Thomas mihimo sa iyang season debut uban sa Cavaliers diin miiskor siya og 17 puntos sud lamang sa 19 minutos sa ilang 127-110 nga kadaogan batok sa Portland TrailBlazers niadtong Miyerkules. (BANATNEWS)
- Latest
