Ramirez hari sa FDR Motack Series
CEBU, Philippines — Si Sylvester Ramirez sa FDR-Mallari Racing mihakot og duha ka titulo sa final leg sa Phoenix-FDR Philippine Motorcycle Time Attack (Motack) Series duol sa pantalan sa dakbayan sa Toledo niadtong Domingo.
Gidominar ni Ramirez ang novice automatic category human gipukan si Nestle Flores, samtang si Rowell Tayo maoy mipahiluna sa ikatulong dapit. Iya na sab gipilde si Flores aron paghari sa Yamaha TFX 150 class diin si John Paul Manatad maoy nalandig sa ikatulong puwesto.
Mikuha sab og atensiyon si Rommel Paz human nanghawod sa novice underbone ug ingon man si Gian Carlo Commendador nga maoy nakampiyon sa kids division.
Si Janesse Lucero maoy gikoronahang hara sa ladies open, samtang sila si Joan delos Santos ug Chloe Mallari maoy miokupar sa ikaduha ug ikatulong luna.
Nagkompleto sa listahan sa mga mananaog mao sila si Franz Seit (sportsbike), Kid Arnold de Gracia (backbone), Lloyd Delantar (beginners underbone) ug Francis Castaneda (beginners automatic). (BANAT NEWS)
- Latest