UFC chief mokiha ni Pacquiao kun...

CEBU, Philippines — Posibleng mag-atubang og kaso si Manny Pacquiao kun padayonon niini ang pakig-negosasyon ni UFC star Conor McGregor alang sa usa ka away.

Matud pa ni UFC president Dana White nga dili makiangayon ang gibuhat ni Pacquiao gumikan kay wala kini katungod nga direktang makigsulti ni McGregor.

Dili pa lamang dugay, si Pacquiao mihimo og kasikas human mi-post og mensahe sa iyang social media nga daw sa gihagit niya si McGregor og boksing.

Gidagkotan pa og samot ni Pacquiao ang kayo human siya mipadayag nga nakigsabot-sabot na siya sa kampo ni McGregor.

Apan giabisohan ni White ang tanan nga mokalma lang una.

Gipahinumduman ni White kadtong mga hintungdan nga si McGregor duna pa’y buhing kontrata uban sa iyang kompaniya ug wa’y gahum si Pacquiao nga makig-estorya ni McGregor nga dili mag-agi kaniya.

Kun magmagahi si Pacquiao ug mounong sa iyang plano, mibahad si White nga lagmit mag-abot silang duha sa hukmanan. (BANAT NEWS)