Oladipo naka-47 points

CEBU, Philippines — Si Victor Oladipo mipabuhagay og career-high 47 puntos uban ang pito ka rebounds ug unom ka assists aron agakon ang Indiana Pacers ngadto sa 126-116 nga kadaogan sud sa overtime batok sa Denver Nuggets sa NBA kagahapon didto sa Bankler’s Fieldhouse sa Indianapolis, Indiana.

Ang Pacers milusad og 8-0 run, apil na ang follow-up shot ni Thad Young sa nahibiling  singko segundos sa regulasyon hinungdan nga ilang nahatod ang duwa ngadto sa  overtime.

Sa dugang singko minutos sa ilang engkuwentro, ang Pacers maoy mikadlit sa unang nuybe puntos dayon na ngadto sa pagkulit sa ikaupat nilang sunod-sunod nga daog. 

Nagbitbit na sila karon og 16-11 nga baraha samtang ang Nuggets natagak ngadto sa 14-12.

Didto sa Detroit, sila si Al Horford ug Kyrie Irving nagkumboya’g 34 puntos sa dihang gibirahan sa Boston Celtics ang Pistons sa iskor nga 91-81.

Samtang ang Celtics nakabawi dayon sa miagi nilang kapildihan batok sa San Antonio Spurs, ang Pistons nakatilaw og unom ka sagunson nga pilde sa labing unang higayon sukad niadtong 2014-2015 season.

Sila si Jaylen Brown ug Marcus Smart parehong mirehistro  og 12 puntos, samtang si Jayson Tatum miamot og 11 puntos sa Celtics nga pabiling naghari sa liderato bitbit ang 23-5 nga baraha.

Sa Sacramento, si DeMar DeRozan mipupo og 13 sa iyang 25 puntos sa ikatulong kuwarter alang sa Toronto Raptors nga milampurnas sa Kings, 102-87 alang sa ikaunom nilang sunod-sunod nga daog.

Si Kyle Lowry mitampo og 15 puntos uban ang 12 ka rebounds ug unom ka assists, samtang si Serge Ibaka miwadwad og 20 puntos alang sa Raptors nga nakadaog didto sa Sacramento sa labing unang higayon sulod sa tulo ka tuig.

Sa uban pang mga resulta sa NBA, si Karl-Anthony Towns mipatuasik og 28 puntos alang sa Minnesota Timberwolves nga  nakaipsot batok sa Dallas Mavericks sa iskor nga 97-92.

Si Jrue Holiday mibahog og 19 sa iyang 34 puntos  sa  katapusang kuwarter aron aswaton ang New Orleans Pelicans ngadto sa 131-124 nga kadaogan  batok sa Philadelphia 76ers, samtang si Kristaps Porzingis mipabuto og 30 puntos aron tabangan ang New York Knicks pagpaksit sa Atlanta Hawks sa iskor nga 111-107. (BANAT NEWS)