Rey 'Suerte' gyud sa UV Lancers

CEBU, Philippines — Si Rey Suerte miposa og pito ka tres sa iyang 31 puntos sa dihang gilampurnas sa University of the Visayas (UV)   Green   Lancers ang University of San Carlos (USC) Warriors, 82-73   aron  paglangkat sa kampiyonato  sa 2nd Asia-Pacific University Games (APUG) basketball  event kagabii diha   sa  Cebu Coliseum.

Sa kinatibuk-an, ang Lancers milansang og 13 ka 3-pointers, apil ang duha ka buzzer-beaters ni Suerte nga nakapuhal sa tinguha sa Warriors nga makabangon .

Nindot unta ang gipakitang labok sa Warriors sa sinugdanan ug gani naglabaw pa sila og dos puntos atol sa halftime sa iskor nga 42-40.

Ang Lancers misikad sa ikatulong kuwarter pinaagi sa 9-0 run aron  pag-ilog sa, 49-42 ug ingon man pagkontrolar sa hingpit sa duwa.

Human miposte og double-digit nga bentaha sa labing unang higayon, 63-53, giablihan ni Gileant Delator ang katapusang kuwarter pinaagi sa usa ka hagpok nga tres nga nakahatag sa Lancers og 66-53 nga labaw.

Igo lamang nakasikit ang Warriors ngadto sa iskor nga 64-72   kay si Suerte mitusak na sab og sagunson nga tres nga nagselyado sa kadaogan sa Lancers uban ang 14 puntos nga labaw, 80-66 sa nahibiling dos minutos sa duwa.

Si Suerte giabagan nilang Delator ug Sheldon Gahi nga nagkumboya’g 25 puntos alang sa Lancers nga miharos og daog sa tanang torneyo nga ilang gisalmotan karong tuiga diin ang kinadak-an nilang nakab-ot mao ang 17th CESAFI title. (BANAT NEWS)