Lomachenko pabiling kampiyon, Rigondeaux misurender
CEBU, Philippines — Padayun nga gipakita ni Vasyl Lomachenko nga siya ang pound-for-pound best fighter karon human niya gidepensaan iyang WBO junior lightweight title pinaagi sa pagpasurender sa sama niyang Olympic gold medalist nga si Guillermo Rigondeaux atol sa ilang sangka kagahapon didto sa New York.
Ang Ukranian ring superstar wa mihatag og kahigayunan ni Rigondeaux nga makaporma dihang gigamit niya iyang kapaspas ug talagsaong lihok sa boxing aron ig-on og mga solidong kinumo ang Cuban.
Si Rigondeaux kinsa gitan-aw nga maoy makasukod sa katakus ni Lomachenko nagsalimuang pagpanagang ug wala na siya mibarug pa sa iyang lingkoranan sa dayun sugud sa seventh round.
Si Lomachenko misaka sa iyang record ngadto sa 10-1, 8KOs, samtang si Rigondeaux kinsa giuwan og 'boos' gikan sa mga fans nga misaksi sa away nakatilaw sa labing una niyang pilde sud sa 18 ka away.
Si Lomachenko mipatama og 55 ka kinumo mas daghan itandi sa 15 ra nga napatugpa ni Rigondeaux. Mirasun hinuon ang nauwahi nga nakahiagum siya og injury sa kamot rasun nga wala siya katarung og sukol.
Ang 28-anyos nga si Lomachenko usa ka two-division world champion nga dugang sa iyang mga kalampusan human usab siya nahimong gold medalist sa Olympics niadtong tuig 2008 ug 2012. — (BANAT NEWS)
- Latest