James, Cavs nakabawi
CEBU, Philippines — Usa ka adlaw human maputol ilang 13-game winning streak, ang Cleveland Cavaliers sa pagpangulo ni LeBron James namungot dihang ilang gipukan ang Philadelphia 76ers, 105-98, kagahapon didto sa ilang balwarte sa Quicken Loans Arena.
Si James padayun sa iyang impresibong season human siya mirehistro sa ika-58 niyang career triple-double nga 30 puntos, 13 ka rebounds ug 13 ka assists. Si James determinado nga mudaog human sila gipilde sa Indiana Pacers niadtong Sabado.
Gibiyaan pa ang Cavs, 96-91, sa final period, apan milusad sila og bangis nga 14-2 scoring rally sa pagpangulo ni James aron masakmit ang daog. Ang Cavs misaka sa 19-8 win-loss record nga ikaduha sa Eastern Conference sunod sa Boston Celtics (22-5).
Didto sa Portland, misulbong ang Houston Rockets, 124-117, sa ikasiyam nilang sunod-sunod nga daog human nila pakupsi ang home team nga Trail Blazers, 124-117.
Si James Harden miburak og 48 puntos alang sa Rockets nga misaka sa 20-4 nga record. Si Chris Paul midugang og 24, samtang si Trevor Ariza adunay 13 puntos. Si Damian Lillard adunay 35 puntos alang sa Trail Blazers, apan nakawang kini human wa kapugong ilang depensa sa atake sa Rockets.
Sa laing bahin, ang Oklahoma City Thunder kinahanglan pa moagi og overtime aron madispatsar ang Memphis Grizzlies, 102-101, ang Los Angeles Lakers nga gibidahan sa Fil-American nga si Jordan Clarkson mipapha sa Houston Rockets, 110-99 ug ang San Antonio Spurs mipatigbabaw batok sa Phoenix Suns, 104-101. — (BANAT NEWS)
- Latest
