Rose mopaubos pa sa operasyon sa dili pa mobalik og duwa

CEBU, Philippines — Nabalik na sa Cleveland Cavaliers si  Derrick Rose gikan sa kapin duha ka semana niya nga paghawa sa NBA tungod sa injury ug personal nga problema.

Bisan  og misaad siya nga motiwas sa iyang karera, dili pa una siya kapakita dayon og aksiyon  tungod kay kinahanglan pa niya mopaubos og  operasyon sa iyang  injury  sa tiil nga naangkon niadtong   Nobiyembre 7 atol sa ilang duwa batok sa Toronto Raptors.

Ang 28-anyos nga si Rose gikataho nga nakigkita sa mga kadagkoan sa Cavs ug mibisita usab  siya sa iyang mga teammates nga nag-ensayo niadtong Biyernes ug  gipakita niya nga nabuhian na siya og  paglaum kabahin sa iyang karera sa basketbol.

Si Rose nagkanayon nga kinahanglan niya magpa-opera tungod sa natipak nga bukog sa iyang  tiil ug human sa rehabilitasyon, andam siya nga moduwa dayon uban sa defending Eastern Conference  division champion.

Si Rose, kinsa mi-average og 14.3 points karon nga season uban sa Cavs miingon nga bulahan  siya tungod kay napunta sa usa ka maayo nga koponan ug  mipasalig nga iyang tabangan ang team nga  mokampiyon pag-usab. (BANAT NEWS)