OKC Thunder pilde sa Nets

CEBU, Philippines — Miiskor og 19 puntos si Caris Levert, samtang  17 puntos ang kang Rondae Hollis-Jefferson   sa dihang ang Brooklyn Nets nakasugakod sa nagbagang opensa ni Russell Westbrook aron pakgangon ang Oklahoma City Thunder, 100-95  sa ilang duwa sa NBA kagahapon didto sa Mexico City.

Ang reigning MVP nga si Westbrook mibahog og 31 puntos uban ang walo ka rebounds ug unom ka assists, apan wala kini nahimo gumikan kay ang Thunder nahagba na sab human makasagunson og tulo ka daog. Sa kinatibuk-an, midailos ang ilang rekord ngadto sa 11-13.

Samtang ang Nets midaog katulo sa katapusan nilang upat ka duwa hinungdan nga nainat ang ilang baraha ngadto sa 10-14.

Human sa Thunder, sangkaon sa Nets ang Miami Heat karong Domingo didto gihapon sa Arena Ciudad de Mexico.

Sa laing aksiyon, si Brandon Ingram milansang og 3-pointer sa nahibiling 0.8 segundos sa duwa aron aswaton ang Los Angeles Lakers ngadto sa kulbahinam nga daog batok sa Philadelphia 76ers, 107-104.

Si Ingram mitapos uban ang 21 puntos.

Sila si Julius Randle ug Jordan Clarkson miamot og 16 puntos matag usa aron putlon ang lima ka sagunson nga pilde sa Lakers.

Si Joel Embiid miratsada og 33 puntos,  samtang si Ben Simmons dunay ‘triple-double’ human mitali og 12 puntos, 13 ka rebounds ug 15 ka assists sa pilderong Sixers.

Sa uban pang mga resulta, si Bradley Beal mipabuhagay og 34 puntos sa dihang gipaluhod sa Washington Wizards ang Phoenix Suns, 109-99, samtang si James Harden mitusak og 29 puntos sa dihang gipakaging sa Houston Rockets ang Utah Jazz, 112-101. (BANAT NEWS)