Don Paulo milatigo sa Bulldogs
CEBU, Philippines — Giharos sa Don Paulo ang tanang pito nila ka duwa sa elimination round ug ang katapusan nilang biktima mao ang Bulldogs, 67-60 sa Sunday.com 4th Conference League niadtong Martes sa gabii didto sa Mandaue Cultural and Sports Complex.
Isip topseed, ang Don Paulo nakabaton og ‘twice-to-beat’ incentives sa semifinals ug ingon man ang Bulldogs nga maoy no. 2 pagtapos sa eliminasyon.
Si Gio Antigua mipabuhagay og 18 puntos alang sa Don Paulo, kansang duwa kontrolado nila human sila milabaw og 26-10 sa first quarter.
Ang Bulldogs nga naghalhal sa maong duwa, gipangulohan ni Jojo Bongo nga mitangag og 13 puntos samtang sila si Diosdado Apa Jr. ug Chris Cabahug mikitkit og 11 puntos matag usa sa pilderong koponan.
Sa lain pang non-bearing game, ang Yamaha Sight miiskor sa ikaduha nilang sunod-sunod nga daog human ilang gipilde ang Therrish Resort Basketball, 79-70.
Miratsada og 20 puntos si Leonil Ibarita aron pangulohan ang Yamaha Sight nga wala na molingi pa human miposte og 60-56 nga bentaha paghuman sa third period.
Gamay ra man tuod ang labaw sa Yamaha Sight, apan ila kining naprotektahan hangtod nahurot ang oras sa duwa.
Si Regidor dela Peña mikamada og 14 puntos, samtang si Jonas Ronolo miariya og 12 puntos sa Yamaha Sight.
Tulo sab ka players sa Therrish Resort ang naka-double figures pinangulohan ni Lymuel Lapinid nga miburak og 21 puntos. Ikaduhang topscorer sa Therrish Resort mao si Jude Pepito sa iyang 16 puntos, gisundan ni Marphe Paden nga adunay 10 puntos.
Ang tinuig nga liga nga gipaluyohan sa VECO gipadagan sa presidente niining si Camilo ‘Tata’ Nadera ug bise presidente Atty. Sally Malig-on.
Puntos matag usa
Unang duwa:
YAMAHA Sight (79) – Ibarita 20, Dela Peña 14, Ronolo 12, B. Malahos 9, Mascariñas 8, Pasana 6, Alcuizar 4, Espija 2, Rendon 2, Mejio 2.
THERRISH Resort (70) – Lapinid 21, Pepito 16, Paden 10, R. Neiz 8, N. Del Castillo 7, V. Neiz 5, W. Del Castillo 3.
Ikaduhang duwa:
DON Paulo (67) – G. Antigua 18, Paradiang 9, Fuentes 9, Fajardo 6, T. Grafe 6, M. Nadera 4, Agbay 3, Entrampas 3, Capinpin 3, Naig 2.
BULLDOGS (60) – Bongo 13, Apa Jr. 11, Cabahug 11, T. Nadera 6, Cha. Ygot 5, Palabay 4, Bacus 4, Apa Sr. 2, A. Antigua 2, Valiente 2. (BANAT NEWS)
- Latest