Warriors daog sa heat

CEBU, Philippines — Sama sa numero sa iyang jersey, si Stephen Curry mipabuhagay og 30 puntos sulod sa 30  minutos, samtang si Kevin Durant midugang og 24 puntos alang sa Golden State Warriors, kansang nagdilaab  nga opensiba sa ikatulong kuwarter nakabugnaw sa   Miami Heat, 123-95  sa duwa nila sa NBA kagahapon didto  sa  American  Airline Arena sa Orlando, Florida.

Si Klay Thompson miabuno’g 19 puntos alang sa Warriors nga miabli sa second half pinaagi sa 18-3 run. Sa   kinatibuk-an gilupig sa Warriors ang Heat sa pinuntosay sa ikatulong kuwarter, 37-17.

Mao kini ang hinungdan nga ang dos puntos nga labaw sa Warriors atol sa halftime niburot ngadto sa 22 puntos, 99-77  padung ngadto sa katapusang bahin sa duwa.

“Nothing magical or no secret sauce to it,” matud pa ni Curry, nga mikadlit og 16 puntos sa unang kuwarter.

Ang Warriors nga mitala sa kinadak-an nilang labaw nga 33 puntos,  nagbitbit na karon og 18-6 record nga maoy labing nindot sa Western Conference.

Si Goran Dragic miiskor og 20 alang sa Heat nga  nilabaw og tres puntos sa unang kuwarter, 36-33.

Apan wala sila makasugakod sa maanindot nilang salida hinungdan nga nasugamak ngadto sa ika-12 nilang pilde sa 23 ka duwa.

Didto sa Oklahoma City, si Russell Westbrook mitali sa ikapito niyang ‘triple-double’ karon nga season aron agakon ang Thunder ngadto sa 90-87 nga kadaogan batok sa   San Antonio Spurs.

Si Westbrook mitapos uban ang 22 puntos, 10 ka rebounds ug 10 ka assists sa Thunder nga nagtangag na karon og 10-12 nga baraha. Ang Spurs natagak ngadto sa 15-8.

Si Steven Adams dunay 19 puntos ug 10 ka rebounds alang sa Thunder nga midaog bisan og ang usa nila ka bitoon nga si Paul George nalimitahan ngadto lamang sa otso puntos.

Sila si LaMarcus Aldridge ug Tony Parker wala makapakita’g aksiyon sa napiang nga Spurs tungod sa ilang injury. (BANAT NEWS)