Katropa mag-ensayo sa lithuania pangandam sa PBA opening
CEBU, Philippines — Sa tuyo nga maputol ang duha ka tuig nga huwaw sa kampiyonato, ang TNT KaTropa milarga paingon sa Lithuania alang sa usa ka training camp.
Ang TNT KaTropa mangandam sa 43rd season sa PBA nga buksan sunod semana.
Si TNT coach Nash Racela nagkanayon, nga kini ang unang higayon nga ang TNT moadto sa usa ka nasud nga sikat sa basketbol aron mabaid pa ang abilidad sa ilang mga players. Ang Gilas Pilipinas nag-ensayo sab kaniadto sa Lithuania atol sa ilang pagpangandam sa FIBA Asia Championship.
Ang TNT ipaubos sa mga sikat nga European coaches ug moduwa usab sila og usa ka pocket tournament batok sa mga commercial teams sa Lithuania.
Posible sab nga makaduwa sa KaTropa ang mga players sa Lithuanian national team. Ang Lithuania maoy ranked No. 4 sa FIBA World rankings.
Bisan pa og nagkalig-on na ang mga koponan sa PBA, si Racela positibo nga molampos sila karon nga season. Ang TNT katapusang mikampiyon sa 2015 Commissioner’s Cup ubos ni coach Jong Uichico diin ilang gipilde ang Rain or Shine Elasto Painters sa Game-7. (BANAT NEWS)
- Latest