Almons, 1 Med nakarekober dayon
CEBU, Philippines — Miposa og 19 puntos si Jobus Bustamante aron pangulohan ang Almons pagkulit sa ikalima nilang daog human gipilde ang Therrish Resort, 76-67 sa Sunday.com 4th Conference League niadtong Miyerkules sa gabii didto sa Benedicto College gym sa A.S. Fortuna St., Mandaue City.
Bisan pa sa maong kadaogan, ang Almons napilit gihapon sa ikaduhang dapit sa standing sa ilang 5-1 nga baraha, sunod sa Don Paulo nga adunay 5-0 record.
Gawas ni Bustamante, sila si James Latonio ug Mark Sanchez miiskor sab og double figures sa Almons nga nakarekober sa second half. Si Latonio miamot og 15 puntos, samtang si Sanchez mitampo’g 10 puntos.
Ang Therrish Resort nga kausa pa lang nidaog sa lima ka duwa gipangulohan ni Ritchie Malahos nga mikamada og 14 puntos, gisundan nilang Neil del Castillo ug Lymuel Lapinid nga nagtampohay og 10 puntos.
Sa laing duwa, ang 1 Med milansang sa ikatulo nilang daog human makaipsot sa Ultimate Gym, 71-67.
Topscorer sa 1 Med mao si Jonathan Cortes sa iyang 16 puntos. Naka-double figures sab sila si Mariel Muñez, Michael Tagayong ug Jojo Carba alang sa 1 Med nga kontrolado kaayo ang duwa gikan sa pagsugod.
Sila si Mike Abrenica ug Saniboy Tambus nagkumboya’g 38 puntos aron pangulohan ang Ultimate Game.
Ang 1 Med ug Ultimate Gym nagsawo na karon sa ikaupat nga dapit sa managsama nilang 3-3 nga baraha ning maong liga nga gipadagan sa presidente niining si Camilo ‘Tata’ Nadera ug bise presidente Atty. Sally Malig-on.
Puntos matag usa
Unang duwa:
1 MED (71) – Cortes 16, Muñez 15, Tagayong 12, Carba 10, Tejana 4, Sayson 4, Magistrado 4, J. Colina 3, Abadia 2, Yorong 1.
ULTIMATE Gym (67) – Abrenica 22, Tambus 16, Alaura 8, Pepito 6, Zanoria 4, Gulbin 3, Apor 3, Joven 2, Manila 2, Corilla 1.
Ikaduhang duwa:
ALMONS (76) – Bustamante 19, Latonio 15, Mar. Sanchez 10, Omolon 8, Mal. Sanchez 6, J. Gonzaga 5, Alivio 4, P. Gonzaga 4, Antigua 3, Borden 2.
THERRISH Resort (67) – Malahos 14, N. Del Castillo 10, Lapinid 10, Rapayla 9, Jordan 7, R. Neiz 6, Chavez 5, Pepito 4. (BANAT NEWS)
- Latest
