UC, Unit 5 naghari sa 27th City Olympics
CEBU, Philippines — Ang University of Cebu (UC) Webmasters ug ang Unit 5 maoy nikampiyon sa tagsa-tagsa nila ka dibisyon sa pagtapos sa usa ka semanang 27th Cebu City Olympics kagahapon didto sa Robinsons Galleria Cebu.
Milampos ang UC pagdepensa sa ilang titulo sa secondary division human mihakot og 59 ka gold, 45 ka silver ug 29 ka bronze medals.
Nabutang sa halayo nga ikaduhang dapit ang University of San Carlos (USC) nga nakapugnit lamang og 32 ka gold, 32 ka silver ug 35 ka bronze medals, samtang mikapyot sa ikatulong puwesto ang University of the Visayas (UV) uban ang 20-13-9 medal tally.
Karibal man tuod ang UC ug USC sa sekondarya, apan nagmabungahon ang ilang paghiusa og puwersa uban ang City Central School ug Zapatera District aron pagtunol sa overall title sa elementary division ngadto sa Unit 5 bitbit ang 44 ka bulawang medalya nga gipalamanan og 42 ka silver ug 27 ka bronze.
Ang Unit 7 maoy ikaduha sa overall human miposte og 27-22-11 g-s-b medal tally ug gisundan kini sa Unit 3 nga dunay 14-6-6 medal count.
Ang UC mikabkab og dugang duha ka golds sa chess kortesiya nilang Chris Aldritz Pondoyo ug Duan Borgonia.
Nagparamdam sab sa ilang presensiya ang ilang archery team nga mihakot og walo ka bulawan ubos sa pagpangulo nilang Nino Maandig ug Khalin Alex Abella. (BANAT NEWS)
- Latest