Sukmagay sa Bohol
TAGBILARAN CITY, Philippines — Usa ka determinado ug inspirado nga Mark ‘Magnifico’ Magsayo (16-0, 12KOs) ang mosaka sa ring diin suwayan niya og ibot ang usa ka dakong babag sa iyang dalan paingon sa world title shot sa dihang modepensa na kini sa iyang WBO International featherweight crown batok ni Japanese challenger Shota Hayashi (30-6, 18KOs) sa main event sa “Pinoy Pride 43: Battle in Bohol” atubangan sa iyang mga katagilungsod dinhi sa Bohol Wisdom School gymnasium.
“Gawas sa world title fight, ang pag-away atubangan sa akong pamilya, kahigalaan ug dumadapig dinhi sa Tagbilaran usa sab sa akong damgo ug natuman na gyud,” matud pa ni Magsayo, kinsa mitimbang og 126 pounds, gaan og usa ka libra itandi ni Hayashi atol sa official weigh-in kagahapon didto sa Island City Mall.
Dako og respeto si Magsayo ngadto sa kanhi Japanese champion nga si Hayashi, apan masaligon siya nga iyang maangkon ang makabungog nga daog batok sa bisitang boksidor.
“Niingon siya nga iya gyud ko tumbahon, pero nalipay ko kay nindot gyud ni among away. Di lang siya mokompiyansa kay basin siya ang sayu matulog,” dugang pa sa WBO ranked No. 2 nga si Magsayo.
Si ALA Promotions President and CEO Michael Aldeguer miingon nga si Magsayo dili motugot nga mapilde kay mao mameligro ang iyang kahigayonan alang sa world title eliminator batok ni top-ranked Joseph Diaz sunod tuig.
“We are looking at a world title eliminator for Mark against Diaz, maybe next year. The winner will be the challenger for the world title currently held by Mexican superstar Oscar Valdez,” matud pa ni Aldeguer.
Sa supporting bouts, si ‘Prince’ Albert Pagara (28-1, 19KOs) makigsangka ni Mohammed Kambaluta (17-3, 6KOs) sa Tanzania, samtang si Jeo ‘Santino’ Santisima laraw usab nga mopatumba ni Kichacng Kim (8-4, 2KOs) sa Indonesia.
Lain pa nga moaway mao sila si Melvin Jerusalem batok Jestoni Autida, Rocky Fuentes batok Ryan Tampus, Virgil Vitor batok John Ray Logatiman, Christian Bacolod batok Ryan Makuputin ug Esneth Domingo batok Lowell Saguisa. (BANAT NEWS)
- Latest
