Binaharay
CEBU, Philippines — Tagbilaran City –Ang ALA Gym undefeated featherweight prospect nga si Mark ‘Magnifico’ Magsayo (17-0, 13KOs) ug kanhi Japanese champion Shota Hayashi (30-6, 18KOs) parehong nangahas nga aduna gyuy matumba kanila sa dihang magbinukbukay sila sa main event sa “Pinoy Pride 43: Battle of Bohol” karong Sabado sa gabii dinhi sa Bohol Wisdom School gymnasium.
Si Magsayo modepensa sa iyang WBO International featherweight title batok sa bisitang Japanese challenger nga si Hayashi sa 12 ka hugna nilang sangka.
Atol sa press conference kagahapon didto sa Bohol Tropics Resort, si Hayashi isog nga mideklarar nga iyang tumbahon si Magsayo.
“I am going to knock him out,” matud pa sa 30-anyos nga si Hayashi. Dugang pa niya nga moretiro siya sa boksing kun ugaling mapakyas siya pag-ilog sa bakus ni Magsayo. “I always wanted big fights and I considered this one as one of my toughest challenges.
Si Kiyoshi Hatanaka, ang trainer ni Hayashi, mibutyag nga ang iyang batos anaa na sa sakto nga kondisyon ug nakig-sparring pa ni kanhi ALA boxer ug one-time title challenger nga si Genesis Servania pangandam ning maong away.
Wala hinuon matandog si Magsayo sa pamahayag sa mga Hapon ug kalmado nga mitubag nga wala siya’y plano nga pakauwawan iyang mga katagilungsod ug segurado siya nga mapukan ang bisitang si Hayashi.
“Ako pa niya (Hayashi), iyang buhaton, dili siya magsige og istorya,” matud pa sa WBO ranked No. 2 nga si Magsayo.
“Tan-awon nato sa ibabaw sa ring. Testingan nato unsa siya kalig-on kun maigo siya sa akong kumo,” dugang pa sa 22-anyos nga si Magsayo.
Si ALA Promotions President and CEO Michael Aldeguer miingon nga krusyal kining atubangon ni Magsayo.
“Mark is facing a tough challenge against a formidable opponent. We will see if he really is ready for a world title fight,” matud pa ni Aldeguer.
Sa supporting bouts ning maong fight nga gipasiugdahan sa ALA Promotions ug ABS-CBN Sports, si ‘Prince’ Albert Pagara (28-1, 19KOs) makigsangka ni Mohammed Kambaluta (17-3, 6KOs) sa Tanzania, samtang si Jeo ‘Santino’ Santisima (14-2, 13KOs) makigsinukliay og kumo ni Kichacng Kim (8-4, 2KOs) sa Indonesia. (BANAT NEWS)
- Latest
