Alvarez grandslam sa ultramarathon

CEBU, Philippines — Gikumpleto ni Bayani Alvarez ang makasaysayanong grandslam, samtang si Rhoda Oporto milampos pagkab-ot sa korona nga nadakin-as sa iyang mga palad sa miaging tuig human gidominar ang tagsa-tagsa nila ka dibisyon sa 3rd Cebu Northwest 100-mile Ultramarathon, usa ka makutas nga lumba gikan sa lungsod sa Daanbantayan padulong sa dakbayan sa Sugbo nga nahuman sayo sa buntag niadtong Domingo diha sa Plaza Independencia.

Si Alvarez sa Spectrum Runners Club mitapos sa  160 ka kilometros nga lumba sulod sa 19 ka oras ug 20 minutos.

Layo kaayo ang nahimutang sa ikaduhang dapit  nga si Paul Delposo  nga mioras og 26:52 ug ingon man si Marlon Baay nga maoy  ikatulo sa oras nga 27:09.

Si Oporto maoy giyukboan nga hara sa women’s division human milabang sa finish line sulod sa 25 ka oras ug 39 minutos, mas paspas pa siya nilang Delposo ug Baay hinungdan nga siya maoy second overall.

Si Marjorie Jore mitapos sa ikaduhang dapit sa oras nga 28:13 ug gisundan kini ni Daisy Batac sa oras nga 29:19.

Naglangkob sa top 10 overall mao sila si Neil Catiil (28:59), Jake Soriano (29:01), Sylar Merson (29:06) ug Villy Ponferrada (30:03).

Kuwalipikado   sila   nga  moapil sa One Cebu 550-kilometer Ultramarathon sunod tuig. (BANAT NEWS)