Butch Surveying nagpabiling buhi

CEBU, Philippines — Buhi pa ang paglaum sa Butch Surveying sa quarterfinals human ilang gibiktima ang Tion, 74-65 sa CELBA Second Conference Basketball Tournament 2017 niadtong Sabado sa gabii didto sa Canduman Housing gym, Mandaue City.

Sila si Ramie Suson ug Dindo Aligway maoy nahimong bida tungod sa nindot nilang salida ilabi na sa second half nga maoy responsabli sa kadaogan sa Butch Surveying ni Engr. Butch Migriño.

Si Suson mikamada og 22 puntos, 14 niini iyang nahimo sa second period, samtang si Aligway miamot og 14 puntos sa Butch Surveying nga miaksiyon og ratol human mahilis ang 13 puntos nga labaw sa second period ngadto na lang sa tres puntos, 54-51 sa fourth quarter.

Nahimong kulbahinam ang duwa dihang nagpuli-puli og iskor ang duha ka kampo, apan ang Butch Surveying  maoy mipatigbabaw human  sab makahimo og daghang turnovers ang Tion ni Rexy Tion nga adunay 4-2 nga baraha.

Si Rey Gonzaga maoy nangulo sa team Tion nga mitikdol og 18 puntos, samtang si Julz Entapan mitimang og 11 puntos.

Sa pasiunang duwa, midaog na sab ang AC Troopers  pinaagi sa pagmasaker sa Lisen, 117-98.

Balanse ang opensiba sa AC Troopers ug timaan niini, unom sa ilang players ang miiskor og double figures nga pinangulohan nilang Lloyd Chavez ug Rex Gonzaga nga parehong mikadlit og 18 puntos.

Ang team owner nga si Dondon  Coloscos miinggansa og 12 puntos sa iyang koponan nga nakarekober human mabiyai, 18-26 sa first period.

Human nila mailog ang momentum, 50-49 sa halftime, ang AC Troopers padayong miataki ug misulbong og maayo ang ilang labaw, 99-65 pagsugod sa final quarter.

Gipangulohan sab nilang Gilbert Lisen ug Barak Recto ang team Lisen nga mipupo’g 18 puntos matag usa.

Ang Lisen nagbitbit na karon og 4-3 nga baraha ning maong liga nga gipaluyohan ni Ronald Yap Elpa.

Puntos matag usa

Unang duwa:

AC Troopers (117) – Chavez 18, Gonzaga 18, Miñoza 15, Coloscos 12, Englis 11, Limosnero 10, Suico 9, Bontilao 8, Saldua 6, Cabahug 6, Ferolino 5, Molit 2, Baclay 2.

LISEN (98) – Recto 18, Lisen 18, Puerto 17, Ecot 13, Villarosa 11, Pacquiao 9, Landiza 4, Rosacena 3, Tigue 3.

Ikaduhang duwa:

BUTCH Surveying (74) – Suson 22, Aligway 14, Gonzaga 11, Herbieto 6, Bukiron 6, Mahusay 5, Canono 4, Yares 4, Magale 2, Alcover 2.

TION (65) – Gonzaga 18, Entapan 11, Setenta 8, Oquias 8, Gomez 7, Cabrera 5, Ramos 2, Tion 2, Genobea 2, Abelong 2. (BANAT NEWS)