Silo batok Rama sa LBG Finals

CEBU, Philippines — Gipanglubong sa team Silo ug team Rama ang tagsa-tagsa nilang kaatbang aron maoy mag-abot sa finals ug mag-ilog sa P12,000 nga ganting salapi sa Lagtang Basketball Gold (LBG).

Unang nakasulod sa finals ang team Silo human nila gitagak ang team Serra sa iskor nga 82-65, samtang ang team Rama mipalagpot sa team Lisondra, 82-64 sa semifinals niadtong Domingo didto sa  Lagtang Sports Arena, sa dakbayan sa Talisay.

Si Jon Cambaya maoy nagbangis og maayo aron pangulohan ang team Silo pinaagi sa iyang 30 puntos.

Laing tulo niya ka teammates ang miiskor sab og double figures sa team Silo nga maoy nikontrolar sa kinatibuk-ang duwa.

Si Jose Tabay mipabuhagay  unta og 26 puntos, apan nausik ang iyang mga paningkamot kay kuwang siya og suporta gikan sa iyang kaubanan.

Sa laing bahin, si Melvin Taran milansang og 18 puntos aron pangulohan ang team Rama   nga  nanginit   sa third period nga maoy gihimo nilang taytayan aron  pagsakmit sa katapusang luna sa finals.

Sila si Insik Javier ug Gogo Fuentes mitimbre’g 13 ug 11 puntos sa maong kadaogan.

Bugtong ang team owner lang nga si Mark Lisondra ang miiskor og double digits sa team Lisondra nga mikamada og 15 puntos.

Ang Silo-Rama finals showdown duwaon sa Domingo sa alas-10 sa buntag. Sa dili pa ang ilang engkuwentro, magsangka una ang Serra ug Lisondra alang sa ikatulong puwesto sa alas-8:30 sa buntag.

Ang mokampiyon mobulsa og P12,000, samtang ang runner-up niini makadawat og P10,000. Ang second ug third runners up makaangkon og P8,000 ug P6,000 nga ganti ning maong liga nga nahimo pinaagi sa paningkamot sa opisyales sa LBG pinangulohan sa ilang presidente nga si Danny Lisondra, Joy Burlans (vice president), Romy Rama (treasurer).

Ang mga duwa ubos sa superbisyon ni league commissioner Roel Traya.

Puntos matag usa

Unang duwa:

SILO (82) – Cambaya 30,  Tabay 14, Pacaña 10, Nacario 10, Delima 6, Econas 6, Seno 3, Tan 3.

SERRA (65) – J. Tabay 26, Barlise 6, Traya 6, Abastillas 4, Bacasmas 4, Eleguin 4, Serra 4, Peloca 3, R. Bacasmas 2, Plarisan 2, S. Yosores 2, F. Yosores 2.

Ikaduhang duwa:

RAMA (82) – Taran 18, Javierto 13, Fuentes 11, Rama 8, Arias 8, Sanoy 6, Oledan 6, Cabo 6, Pardo 2, Mosqueda 2.

LISONDRA (64) – Lisondra 15,  Lastimosa 8, Chef Abatayo 8, Canedo 6, Reyes 5, R. Abatayo 4, Labora 4, Valiente 4, Batatas 4, Echavez 2, Laborada 2, Eman 2. (BANAT NEWS)