Ancajas mohagit sa ubang kampiyon

CEBU, Philippines — Human sa makapakurat niyang kadaogan batok ni Jamie Conlan duha ka adlaw ang milabay, gisaytan karon sa Pinoy’ng kampiyon nga si Jerwin Ancajas ang mga dagko nga ubos sa super flyweight division.

Ang 25-anyos nga si Ancajas nanginahanglan lamang og unom ka hugna aron madepensaan sa ikatulong higayon ang iyang IBF super flyweight title batok sa kanhi wa’y pildeng si Conlan didto sa SSE Arena sa Belfast, Northern Ireland.

Gitumba ni Ancajas si Conlan sa unang hugna, ug giusban  sa ikatulo ug ikaupat nga hugna sa wala pa patikangkanga sa hingpit ang Irish  challenger sa ikaunom nga hugna.

Miaway ubos sa MP Promotions ni Manny Pacquiao, si Ancajas nakadawat og P4 million nga ganti nga maoy labing dako sa iyang karera.

Segun sa nagkadaiyang mga taho, si Ancajas naglantaw karon nga sangkaon ang mga kampiyon sa ubang dibisyon.

Kini naglangkob nilang Naoya Inoue sa Japan (WBO), Srisaket Sor Rungvisai sa Thailand (WBC) ug Khalid Yahai sa United Kingdom (WBA).

Gawas niini, si Ancajas mangambisyon sab nga makaaway sa Amerika sunod tuig. (BANAT NEWS)