Curry miaga sa Warriors
CEBU, Philippines — Si Stephen Curry mikadlit og season-high 39 puntos uban ang 11 ka rebounds ug unom ka assists aron pag-aswat sa defending champion Golden State Warriors ngadto sa 118-111 nga kadaogan batok sa Brooklyn Nets sa NBA kagahapon didto sa Barclays Center sa Brooklyn, New York.
Midaog ang Warriors bisan og wala makaduwa si Kevin Durant tungod sa injury sa iyang tiil. Mao kadto ang ikasiyam nilang daog sa katapusan nilang 10 ka duwa aron pakigsawo sa Houston Rockets sa labing nindot nga rekord sa Western Conference bitbit ang 13-4 records.
Si Klay Thompson miamot og 23 puntos ug 10 ka rebounds ug milansang siya og tres sa ika-71 nga sagunson sa duwa. Ang Warriors wala na mopaginhawa pa sa Nets human milabaw og 22 puntos sa halftime.
Si Allan Crabbe mitali og 25 puntos alang sa Nets nga kawalo napilde sa katapusan nilang 11 ka duwa.
Sa lain pang aksiyon, si DeMar DeRozan mipabuto og 33 puntos sa dihang gipakaging sa Toronto Raptors ang bisitang Washington Wizards, 100-91 ug aron sab pag-inat sa ilang baraha ngadto sa 11-5, samtang si Lonzo Ball mihimo na sab og “triple-double” sa ikaduhang higayon sa dihang gilumsan sa Los Angeles Lakers ang Denver Nuggets, 127-109.
Si Ball mipupo og 11 puntos, 11 ka assists ug 16 ka rebounds.
Wala sab magpa-alkansi sila si Bojan Bogdanovic ug Myles Turner nga nagkumboya’g 51 puntos sa Indiana Pacers nga milubong sa Miami Heat, 120-95 ug ingon man si Andre Drummond nga mitimbre og 20 puntos ug 16 ka rebounds sa Detroit Pistons nga nakaipsot sa Minnesota Timberwolves, 100-97.
Didto sa Phoenix, si T.J. Warren mikolekta og 27 puntos aron pangulohan ang Suns nga miihaw sa Chicago Bulls, 113-105. (BANAT NEWS)
- Latest
