Jumamil, Torres midominar sa San Remigio triathlon

CEBU, Philippines — Sila si Paul Jumamil ug Feelin Torres ang nag-una sa tagsa-tagsa nila ka dibisyon sa premier division sa San Remigio 8080 Triathlon kagahapon didto sa lungsod sa San Remigio.

Si Jumamil wa maapsi sa men's open sa iyang oras nga 3:18:26. Nagsunod kaniya iyang teammate sa Rider Omega Tri nga si Jorry Ycong nga adunay 3:21:01 nga oras, samtang milandig sa ikatulong dapit si Emmanuel Commendador sa WS Tri sa oras nga 3:23:53.

Sa iyang bahin, si Torres maoy reyna sa women's class human siya milabang og una sa finish line sa oras nga 4:01:01. Misakiyo sa ikaduhang dapit si Rue Panibon sa oras nga 4:09:55, samtang si Cianyl Gonzales maoy third placer sa oras nga 4:11:29.

Ubang Rider Omega Pro triathletes nga midaog sa tagsa-tagsa nila ka mga age-groups mao sila si Sean Yu  (15-19) , Banjo Norte (20-24) ug June Marq Ocana (40-44).

Laing mga mipatigbabaw sa age-group competition sila si Kyrie Mejares/Junela Mahusay (25-29),Rosalito Albina/Louie Villacin (30-34),Joseph Miller/Aimee Dequina (35-39),Tony Cabardo (40-44), Jean Christopher Covacho/Jadulco Luisita (45-49) ug Venancio Amora sa 50-above division.

Ang Spectrum Tri Team maoy naghari sa 8080 relay gisundan sa Sante Barley ug Rider Omega Pro sa ikaduha ug ikatulong dapit.

Si Kim Remolino mao ang kampiyon sa 4040 class sa oras nga 1:39:55, gisundan nila ni Alfred Pacabis (1:42:14) ug Renz Wynn Corbin (1:44:51), samtang sila si Karen Manayon (1:58:01), Moira Frances Erediano ( 1:58:02) ug Nicole Marie Del Rosario (2:04:31) maoy top three finishers sa women's category. (BANAT NEWS)