UV kampiyon sa CYBL caging

CEBU, Philippines — Ang University of the Visayas (UV) mipakaging sa Sacred Heart School-Ateneo de Cebu (SHS-AdC), 88-80, aron paglangkat sa kampiyonato sa Under-19 division sa Cebu Youth Basketball League (CYBL) 3rd Conference niadtong Sabado didto sa Magis Eagles Arena.

Bugnaw ang gipakitang duwa sa UV sa nag-unang duha ka kuwarter hinungdan nga nabiyaan sila og otso puntos sa halftime, 34-42.

Apan pinaagi nilang Denzel Sabroso ug Kenneth Brillo, nagmangtas ang UV sa ikatulong kuwarter hinungdan nga ilang nailog ang labaw, 56-55.

Sikit kaayo ang kumbati sa duha ka kampo sa naghinapos nga bahin sa duwa. Mi-abante og balik ang SHS-Ateneo, 64-62, apan si Brillo mipasiugda og nagbagang 14-2 rally nga nakahatag sa UV sa kinadak-an nilang labaw, 76-66, human sa tres ni Sabroso sa katapusang 4:45 sa duwa. Wala na makabawi pa sukad niadto ang SHS-Ateneo.

Si Sabroso maoy nangu sa UV ni coach Gerald Ylaya uban ang 26 puntos samtang si Brillo ug Joshua Renz Ortiz midugang og 15 puntos matag usa. Dako sab og natampo si Ivan Maata nga mi-iskor og 14.

Nangu sa Magis Eagles mao sila si John Aguilar ug Ray Lewis nga nagkumboya og 29 puntos. (BANAT NEWS)