Ancajas mipakamang ni Conlan upat ka higayon
CEBU, Philippines — Ang garbo sa mga Pinoy nga si Jerwin Ancajas milampos pagdepensa sa iyang IBF world super flyweight title human gipalukapa upat ka higayon ang Irish niining challenger nga si Jamie Conlan kagahapong adlawa didto sa SSE Arena sa Belfast, Northern Ireland.
Sa sayong bahin sa unang hugna, natumba dayon si Conlan human ma-igo sa solidong body shot ni Ancajas.
Nagsenyales kadto sa kumpletong dominasyon ni Ancajas sa gikatakda untang 12 ka hugna nga nasayo og human gumikan kay wala na makasugakod si Conlan sa mabangis nga mga kinumo nga gipauwan kaniya sa Pinoyng kampiyon.
Nagpadayon ang bagsik nga ataki ni Ancajas hinungdan nga iyang gipatikangkang na sab si Conlan sa ikatulo ug ikaupat nga hugna.
Sa ikaunom nga hugna, si Ancajas milabay og makusog nga right cross sa ulo nga nakapahagba ni Conlan sa ikaupat ug katapusang higayon.
Bisan og nakabarog pa si Conlan human giiphan, ang reperi mao nay miundang sa away aron dili matiwasan og kastigo si Conlan.
Mao kadto ang ikatulo nga malampusong depensa ni Ancajas, pulos nahitabo gawas sa nasud, sa korona nga iyang nasakmit human gipukan si McJoe Arroyo sa Puerto Rico usa ka tuig ang milabay.
Si Ancajas nagbitbit na karon og 28-1-1 record uban ang 19KOs, samtang si Conlan nakatilaw sa labing una niyang pilde sa 20 ka away uban ang 11KOs. (BANAT NEWS)
- Latest
