Way makapugong Celtics naka-15 na ka daog; Warriors mipaksit sa Sixers

CEBU, Philippines — Si Kyrie Irving mitikdol og 30 puntos samtang si Jaylen Brown mipabuhagay og career-high 27 puntos sa dihang gilabhan sa Boston Celtics ang Atlanta Hawks, 111-99, aron pag-inat sa nagkadena nilang daog ngadto sa 15 sa NBA kagahapong adlawa didto sa Philips Arena sa Atlanta, Georgia.

Bitbit ang 15-2 nga baraha, ang Celtics mao karon ang naghari sa liderato sa NBA ug gitabla sab niini ang labing nindot nga record sa kasaysayan sa ilang prangkisa.

Ang Celtics nabiyaan og 16 puntos apan dali kining nakagukod og nakalabaw sa labing unang higayon human sa 3-pointer ni Brown sa tunga-tungang bahin sa ikatulong kuwarter.

Sud sa 31 puntos, si Irving mipasud og 10 sa 12 niya ka itsa na niini ang lima ka tres ug way sipyat sa lima niya ka free throws.

Dako sab og naambag sila si Marcus Morris ug Jayson Tatum nga miposte og 14 puntos matag usa alang sa Celtics nga wala na makatilaw og pilde sukad nahisukamod sa nag-una nilang duha ka duwa.

Si Dennis Schroder mihipos og 23 puntos ug si Kent Bazemore mitali og 19 puntos alang sa Hawks nga natagak ngadto sa ika-13 nilang pilde nga giatbangan lamang og duha ka daog.

Didto sa Wells Fargo Center sa Philadelphia, Pennsylvania, si Stephen Curry mipatuasik og 35 puntos ug si Kevin Durant midugang og 27 alang sa defending NBA champion Golden State Warriors nga  impresibong mibangon human ma-alkansi og 22 puntos  dayon na ngadto sa pagpatiurok sa Philadelphia 76ers, 124-116.

Si Joel Embiid miiskor og 21 ug si Ben Simmons mipupo og 23 puntos ug 12 ka assists alang sa Sixers, nga naglabaw og 74-52 sa halftime.

Apan ang Warriors milusad og bangis nga ataki sa ikatulong kuwarter pinaagi sa 38-15 run aron paglabaw sa iskor nga 90-89 human sa tres ug duha ka free throws ni Curry.

Misamot pa ang kainit sa Warriors sa katapusang kuwarter hinungdan nga ilang gibiyaan ang Sixers og 10 puntos, 99-89, human sa dunk ni Draymond Green nga maoy nagtuldok sa ikatulong kuwarter.

Wala na molingi pa sukad niadto ang Warriors aron pag-inat sa ilang record ngadto sa 12-4.  Ang Sixers nadakin-as ngadto sa 8-7. (BANAT NEWS)